प्रशालेमध्ये नवरात्र उत्सवानिमित्त भोंडला कार्यक्रम गुरुवार दिनांक 15 ऑक्टोबर 2026 आयोजित करण्यात आला. विद्यार्थ्यांना महाराष्ट्राच्या समृद्ध संस्कृतीची आणि लोकपरंपरेची ओळख व्हावी, तसेच त्यांच्यात सामूहिकतेची आणि आनंदाची भावना निर्माण व्हावी या उद्देशाने या भोंडला कार्यक्रमाचे आयोजन करण्यात आले होते.

कार्यक्रमाची सुरुवात अतिशय भक्तीमय आणि पारंपरिक वातावरणात झाली. भोंडल्याचे प्रतीक असलेल्या हत्तीच्या मूर्तीचे पूजन करण्यात आले. शाळेतील काही विद्यार्थी, शिक्षिका आणि मुख्याध्यापकांनी मिळून हत्तीला हार अर्पण केला, रांगोळी सजवली आणि मनोभावे पूजा केली. हत्ती हा समृद्धी आणि आनंदाचे प्रतीक मानला जातो, त्यामुळे या पूजनाला विशेष महत्त्व होते.

हत्ती पूजनानंतर सर्व विद्यार्थिनींनी हत्तीभोवती एकत्र येत मोठा फेर धरला. रंगीबेरंगी पारंपरिक पोशाखात नटलेल्या विद्यार्थ्यांचा उत्साह ओसंडून वाहत होता. विद्यार्थिनींनी टाळ्यांच्या तालावर आणि लयबद्ध पाऊल टाकत भोंडल्याची "ऐलमा पैलमा गणेश देवा..., एक लिंबू झेलू बाई..., कारल्याचा वेल लाव गं सुने..., इत्यादी पारंपरिक गाणी गायली. शिक्षिकांनीही विद्यार्थ्यांचा उत्साह वाढवण्यासाठी गाण्यांमध्ये सहभाग घेतला. संपूर्ण शाळेचे प्रांगण गाण्यांच्या सुरांनी आणि टाळ्यांच्या आवाजाने दुमदुमून गेले होते.

भोंडल्याचा सर्वात रंजक आणि उत्सुकतेचा भाग म्हणजे 'खिरापत ओळखणे'. फेर संपल्यानंतर विद्यार्थिनींना ती खिरापत कोणती आहे हे ओळखण्याचे आव्हान देण्यात आले. विद्यार्थिनींनी वेगवेगळ्या पदार्थांची नावे सांगून खिरापत ओळखण्याचा आनंद घेतला. विद्यार्थ्यांना खिरापत म्हणून भेळ देण्यात आली. कार्यक्रमाच्या शेवटी सर्व विद्यार्थ्यांनी आणि शिक्षकांनी एकत्र बसून चवदार भेळीचा आस्वाद घेतला.